 |
| Pdt Bernard TP Siagian, MTh. |
(Soara ni naposo ni Debata sian Tano Papua)
Nunga
sar barita ni Amanta Aiptu Labora Sitorus di bangsonta Indonesia, gariada tahe
sahat tu desa na ualu di liat portibi on. Ianggo pandok ni na torop nunga gabe
Kasus Nasional manang mendunia, ala nunga ditayangkan jala dihatai angka tokoh
pengamat angka na pistar. Hape sahalak na metmet jala na sederhana do ibana
martimbangkon baritana i. Alai sahalak na dihaholongi dongan dohot masyarakat
na humaliang do ibana. Serep do rohana dompak angka na ro mangido pangurupion,
jala buas marsilehonlehon mangurupi dongan.
Alai
sipata songon i do na masa di hajolmaon. Sai adong do dongan na so apala dongan
ala ni hamajuon ni donganna, lumobi ma i di sadasada organisasi manang institusi.
Ndang sai tarbahen tutu manubut roha ni sude halak, lumobi molo parpangkat
naung timbo. Songon i ma na masa tu Amanta Sitorus on.
Nang
pe torop “alona” di Kota Sorong angka pengusaha “sipitpit” panonggor (i ma na
digoari “Kompi A”: A Liong, A Seng, A Cai, dlna.), alai ndang pola talu ibana
maralohon nasida di bisnis naung pinungkana marpulu taon na salpu. Adong ma
sahalak na targoar Marthen Reno (pensiunan Polisi pangkat Kompol), keturunan
Cina na marbisnis hau ilegal tu Cina, niurupan ni angka Anggota DPR Pusat
(isara ni Amanta Robert Kardinal, dna).
Alai ndang taralo nasida Amanta Sitorus
on, ala solhot jala rosu do parsaoran nang rohana tu angka halak Papua
(pribumi) na di luat i. Ai gabe songon Ama manang aleale do ibana tu angka
halak i. Jala pos do roha nasida di godang angka na ringkot sipangidoan tu
Amanta i. Gariada tahe, nang di angka tano nampuna ni angka Kepala Suku, sai tu
Amanta Sitorus i do diparlehon nasida tuhoron ni Amanta i. Songon i nang dohot
angka hau na sian angka Tano Adat, sai dipantaruhon do tu Amanta i.
Sandok,
sude do usaha na pinungka jala pinadalan ni Amanta Sitorus i ndang adong na so
marijin. Singkop do sude angka Ijin Usaha ni Perusahaanna. Sai dijujui angka
Bupati dohot Walikota do asa tu Amanta Sitorus dipasahat ia adong angka proyek
siulaon. Godang do nasida nang angka program ni Pamarenta diurupi Amanta
Sitorus i, na sipata tarlambat manang hurang ris parsagi ni “raskin” tu
masyarakat. Sai rade do Amanta Sitorus pajolohon nasa na tarbahensa.
Sian
laon-laon ni ari, lam godang jala martimburak ma huroha persaingan bisnis di
luat Sorong naung lam tu majuna, lumobi mardomu tu luat Raja Ampat naung lam
buka gabe objek Wisata Dunia. Lam jut ma ra roha ni angka par-“Kompi A” i,
siala na so tarbahen nasida memonopoli pasar di luat i. Maol ma ra di nasida
par-“Kompi A” i marnampunahon lahan di lokasi na strategis laho pajongjong
angka aset songon insfrastruktur di angka usaha Wisata. Ndang na dihalomohon
Amanta Sitorus i na masa si songon i. Alai ndang olo angka halak Papua i mangalehon
tanona be asing ni tu Amanta Sitorus.
Sian
i do gabe marangkal ma tutu nasida. Dipangke nasida ma hagogoon parhuaso sian
bagasan institusina laho pasohon usaha ni Amanta Sitorus i. Jala ra sahat tu na
pamatehonsa, ala godang do diboto Amanta Sitorus angka “permainan” par-Kompi A
mar-Sertifikat palsu.
Amanta Wakapolda ma dipangke nasida. Dipatangkuphon ma
Amanta Sitorus marhite kerjasama dohot Bareskrim Mabes Polri. I ma naung
tarbarita di angka media Nasional, na mambahen i gabe Kasus Nasional. Ai sugarina
holan dalam lingkup Sorong manang Papua i, ra ndang pola balga gabe barita
Nasional songon naung masa on.
Hape
dung ditangani Mabespolri kasus ni Amanta Sitorus i, ndang barani pulut be
nasida mangudutisa, ala lengkap do sude Surat Ijin ni angka usahana. Ndang tutu
adong ilegal Logging dohot ilegal BBM songon na dihatahon hian. Gabe dipaulak
Mabes ma tu Polda Papua, asa di Polda ma Amanta Sitorus i ditahan. Direkayasa
ma muse tuduhan tu pencucian uang. Asa songon na toho, dipapungupungu ma
bilangan ni hepeng na di rekeningna, pola didok mar-1,5 Triliun.
Ndang ditahan
ibana di Polres Sorong, ra ala mabiar didemo masyarakat, so tung diroro maon tu
Mapolres. Nang pe songon i, sai ro do tutu angka na sian Sorong manjumpangi
Amanta Sitorus tu Polda mardongan iluilu paboa holsoholso nasida naung gabe
pengangguran ala ditutup sude angka perusahaan ni Amanta Sitorus i songon dalan
ni ngolungolu nasida.
Nuaeng
pe nunga adong tarbege baritana, naeng ro nama angka par-Sorong tu Jayapura
laho demo tu Polda asa paluahon Amanta Sitorus. Mardomu tusi, siala ni na so
dapot ni Polda dope pelanggaran hukum ni Amanta Sitorus, gabe dilululului ma
muse angka dia na boi gabe tuduhan na asing laho manggojaphon torus ditahan
disi. Nuaeng dung naeng marujung nama tingki status tahanan Kejaksaan di ari 17
Juli on, dipasahat Polda ma pangidoan tu Pengadilan laho paganjanghon 2 bulan
nari masa penahanan tu Amanta Sitorus.
On
do na mambahen mansai dokdok situtu diarsakhon roha ni Amanta Sitorus i. Sai
dijugulhon Amanta Wakapolda i do huroha, pola ingkon pamateonna sahat tu na
agoan hosa maon Amanta Sitorus. Alai dia ma dohonon. Bangkona do i, molo dung
sapala marsala sada na sangap, pola do huroha ingkon agohononna hosa ni na
metmet i. Tudos songon na binahen ni si Ahab tu si Nabot, dohot si Daud tu si
Uria na di Padan Na Robi i.
Tangkas do pandok ni Amanta Sitorus, ndang na adong
sangkap ni rohana laho mangalo manang na naeng pailahon Pimpinan dohot
institusina. Ai dihangoluhon do tangkas loyalitas tu Pimpinan. I do umbahen asa
ndang adong pola na salelengna on angka Pimpinan na mangorai ibana padalanhon
usahana naung marpulu taon, jala diboto sude angka Pimpinanna do i.
Ndang
dapot rohana boasa songon i posana pambahen ni Amanta Waterpao i tu ibana. So
tung maon naeng pamateon ni Jenderal i ibana na metmet on, asa laos auphononna
bangkena tu laut. On do biar ni rohana nuaeng. “Atik naung rintik do Jenderal
i,” ninna rohana. “Ai aha ma salangku?” Sai ninna do.
“Aut na didok nian, ‘Satonga ma di au artam i!’” ninna ibana di rohana mandok Jenderal
i, “na lehononku do!” Ninna ma muse, “Ai laos so huboto dia na sala na hubahen?
Gabe rintik nama au mamingkiri on sude. Hape iba, parpangkat na oto do didok
rohangku, songon sahalak Sersan, na tangkas ingkon marsiajar hasintongan dohot
uhum sian angka Pimpinan nian. Lumobi naung marpangkat Bintang, angka Profesor
nama i di rohangku. Alai boasa ma songon on dibahen tu au? Ai na so ianakhonna
do au diauhon roha ni Pimpinanku angka na di ginjang an?” Songon i ma angka
hatahata ni Amanta Sitorus, sai margudongpong di bagasan rohana sandiri.
Sian
on do ra na naeng huuji mandok sian hadirionku songon Pandita ni HKBP au di
Tano Papua, na gok intrik politik dohot ragam ni angka hamaolon “krisis
kemanusiaan”. Ndang na sarupa halak Batak songon angka pendatang sian suku
dohot bangso na asing sian desa na ualu marrongoman ro manggohi Tano Papua on.
I do nang na sai huondolhon tu angka halak Batak di jamitangku di gareja nang
di angka parpunguan Batak. Ai halak Batak, angka bangso naung tarpasupasu do
hita na ro tu angka luat parserahan songon nang na tu luat Papua.
Pinaborhat ni
angka tangiang ni natuatuanta be do hita sian bona pasogit, dohot Barita Nauli
naung taguruhon sian angka naposo ni Debata di gareja, asa gabe pasupasu manang
tu dia hita ditongos Tuhan Jesus. Tu Papua on pe, na laho manghophop dohot
mangajari bangso Papua, haha-anggi dongan sahaporseaonta, na tongon di bagasan
haotoon i dope hita disuru Tuhan Jesus. Ndada na mangalului pandaraman sambing
hita halak Batak, laho mambuat hamoraon ni Tano Papua hita, gabe songon angka
panangko.
Molo angka bangso na asingna i, angka panangko do nasida tutu, jala
siago tondi, na marsangkap naeng manggojaphon Papua gabe pangusean mudar dohot
pamunuon. Gok do tutu angka sahit dohot parungkilon na martimburak dibahen
nasida lam di tingki parpudi on, na mambahen sahitsahit dohot hamatean, marhite
firus HIV/Aids songon i nang “penculikan” anak diboan laho “cuci otak” tu angka
pesantren na di Pulo Jawa. Songon i tong nasida partigatiga na mangarajai
ekonomi (pasar).
Songon
Pandita ni HKBP au, naung leleng huparsinta hian laho mangula di luat Papua,
dunghon ni naung hudalani na jolo di taon 1988, uju mahasiswa STT Jakarta dope
au, nunga huida jala huhilala pardangolan ni Tano Papua lumobi siala ni
hasilomon (Arabisasi) i.
Nuaeng dung gabe Pandita Ressort Papua au mamungka ari
18 Nopember 2012 i, naeng do hupaandar angka na tau sihobasan ni HKBP lumobi
angka na marpardomuan tu parngoluon ni halak Batak na di luat Papua. Suang
songon i nang angka na tau manghehei parngoluon ni halak Papua pe. Naeng do
botoon ni sude bangso Batak, bangso na tarpasupasu do halak Batak dunghon ni
“Apostel” Nommensen. Khusus tu Tano Papua, na ditongos Tuhan Jesus do angka
halak Batak bahen aleale ni halak Papua na tau paluahon Tano Papua sian
haholomon dohot hapogoson.
Songon
halak Batak, “aset” ni HKBP do nang Amanta Labora Sitorus, naung tarpasupasu
jala na burju mangalehon artana laho manumpahi pangkobasion nang hajongjongan
ni HKBP di Tano Papua, khususna di Sorong. Ai nunga disangkapi nasida hian rap
dohot angka halak Batak ruas ni HKBP na di Sorong, laho pajongjonghon gareja di
sada lahan na strategis na naeng pelehononna tu Tuhan i, asa saut jongjong
gareja HKBP di Sorong. Didok nasida do, las ni roha sambing, sai hira na
manjalo pasupasu na mansai balga do ibana molo dijalo HKBP silehonlehonna tu
huria i.
On
do na hupasahat tu Amang, songon sahalak Batak, natuatua naung dipasupasuhon
Tuhan posisi jabatan na timbo nang parsaoran na umbidang di institusi
Kepolisian hian. Anggiat tung adong solusi dohot pangurupion laho paluahon
Amanta Sitorus i so pola manegai tu angka tatanan hukum nang citra Kepolisian
manang oknum Pimpinanna, marhite angka pendekatan pribadi manang keluarga. Asa
tung mardame sonang ma hita di luat Papua naung gabe Tano Kanaan di halak
Batak. Asa tung gabe pasupasu ma hita Batak tu pangisi ni luat i, angka dongan
sahaporseaon i.
Jayapura, 8 Juli 2013
Soara
hadameon sian Tano Papua:
Pdt Bernard TP Siagian, MTh.
(Pandita HKBP Ressort Papua)
Tidak ada komentar:
Posting Komentar